Në reagimin publik të kryeministrit Edi Rama për rastin e Saimir Tahirit nuk kanë munguar komentet e qytetarëve. Bien në sy komentet negative për Tahirin, një nga ish-ministrat më të përfolur të qeverisë në mandatin e parë.
Duke iu përgjigjur njërit prej komentuesve që i thotë se ka ardhur koha tu tregojë shqiptarëve nëse e mbron apo e lufton krimin Rama thotë se mban krahun që i kanë caktuar shqiptarët, dhe se kush shkel ligjin do të shkojë drejt burgut.
Ndërkohë që një komentues tregohet më i ashpër, ai e akuzon Ramën për lidhje të forta të kabinetit të tij me krimin. Rama thotë se përgjegjësia është individuale dhe jo kolektive në një sistem demokratik.
“Nuk ekziston ne demokraci koncepti i nje kabineti te lidhur me krimin, sepse përgjegjësia eshte individuale dhe as kolektive, as shoqërore, as farefisnore!”shkruan mes të tjerash Rama.
Një tjetër komentuese i ka thënë Ramës të mos gënjejë dhe të mos mbrojë kriminelët.
“Nuk mbrojta kend, as thashe qe ata gënjejnë sepse këtë duhet ta provojnë organet ligjzbatuese,” i është përgjigjur Rama, duke nënkuptuar se cështja e Tahirit është e paqartë për të dhe pret të zbardhet nga organet e drejtësisë.
Mes shumë komenteve në postimin e tij, ka pasur edhe qytetarë që i kanë kërkuar të japë dorëheqjen nëse do të tentojë të mbrojë Saimir Tahirin.
