Kryetari i Partisë Demokratike, Lulzim Basha, ka mbledhur sot opozitën e bashkuar, ku do të bëhet prezantimi i platformës për zgjedhje të lira e të ndershme, dhe detyrat e qeverisë tranzitore. Takimi vjen disa orë përpara protestës së paralajmëruar, ku nga ora 18:00-20:00 do të bllokohen rrugët kryesore në 12 qarqet e vendit.
Kryedemokrati Basha tha gjatë prezantimit të platformës për qeverinë tranzitore, se kjo qeveri do të ketë 10 detyra për të garantuar zgjedhje të lira dhe të ndershme.
“10 detyrat e qeverisë tranzitore për të garanuar zgjedhje të lira dhe të ndershme. Nuk kërkon ndryshime ligjore, vetëm vullnet politik. Ky kryeministër dhe ministrat të jenë jashtë konfliktit të interesit, të mos kenë prioritet kapjen e pushtetit me çdo kusht, duke bashkëpunuar me kriminelët, por të zbatojnë ligjin.
Kryeministri dhe qeveria do jenë tranzitore, për të garantuar një proces të lirë zgjedhor. Zgjedhje me Edi Ramën kryeministër nuk do të ketë, zgjedhje pa opozitën nuk do ketë, janë farsë, janë një tentativë e dështuar për votim.
Ne nuk do lejojmë që krimi të bëjë zgjedhje në Shqipëri. Zgjedhjet do të mbahen kur të jenë ndëshkuar hajdutët e votave në 2015 dhe 2017. Largimi i Ramës i hap rrugë zgjidhjes politike, hapjes së dialogut me PS për qeverinë tranzitore, për masat që duhen marrë për të krijuar kushte për zgjedhje të lira dhe të ndershme”.
