Pak çaste më parë ka përfunduar takimi mes 4 mjekëve dhe ministres së Shëndetësisë, Ogerta Manastirliu, në godinën e Kryeministrisë. Ministrja tha në një deklaratë për mediat se do të shqyrtohen të gjitha kërkesat e parashtruara nga bluzat e bardha, e ndërsa takimet do të vijojnë javën e ardhshme. Ajo i mëshoi fort faktit se Qeveria ka vullnet për të përmbushur kërkesat e mjekëve.
“Ne kemi diskutuar shumë konkretisht për pikat që përfaqësuesit e sindikatës kanë sjellë, ne do të shqyrtojmë të gjitha kërkesat.
Takimet do të vijojnë javën e ardhshme. Mjekët dhe infermierët, Ministrinë e Shëndetësisë e kanë shtëpinë e tyre. Takimet e ardhshme do të zhvillohen në Ministri.
Ne do të dëgjojnë kërkesat e tyre, janë 4 pika që do të diskutohen, janë çështje që do të diskutohen edhe në biseda të tjera.
Janë kërkesa që kërkojnë ekspertizë dhe ndërkombëtare, që ne të bëjmë më të mirën. Platformën e bashkëpunimit ne e kemi të ngritur. Qeveria ka vullnet për të përmbushur kërkesat e mjekëve dhe i kemi mbështetur në çdo moment.
Ndaj ne jemi këtu, ne jemi të gjithë së bashku në çdo moment të ditës. Ne do të bëjmë më të mirën. Ne jemi këtu për konsolidimin e kësaj platforme”, u shpreh ministrja.
