Kryeministri i Maqedonisë, Zoran Zaev në muajin mars do të bëjë “filtrimin” e qeverisë së tij, teksa do përdorë “fshesën” për pastrimin e qeverisë nga ministrit që nuk kanë qenë të suksesshëm, apo aktivë.
Po ashtu, në shënjestër janë edhe ministra të LSDM, BDI-së, por edhe ministri i vetëm i RDK-së.
Burime qeveritare të INA nuk përjashtojnë se do të ketë ndërrim të ministrive, ndërsa sipas tyre rikonstruktimin e ka paralajmëruar vetë Zaev.
“Do të vlerësohet puna e ministrave dhe ajo që kanë arritur. Këtë e ka paralajmëruar vetë kryeministri. Por për momentin nuk mund të themi asgjë rreth kësaj teme se kur do të ndodhë”, thonë burime nga shërbimi për informim i Qeverisë.
Në rast se do të ndodhë ndërrime të ministrive, nuk përjashtohet që RDK të humbë ministrinë e pushtetit lokal dhe të marrë ndonjë post zv/ministrash. Por nga ana tjetër, poste ministrore do të ketë ose për PDSH në rast se bihet dakord për të qenë pjesë e ekzekutivit, ose nëse ASH ndërron mendje dhe mbetet në Qeveri.
Nga Qeveria thonë se asgjë s’është definitive për dorëheqjet e ASH dhe se sipas tyre, Zaev ka lënë të hapur postin e zv/kryeministrit për reforma për partinë e Ziadin Selës.
