Qeveria italiane ka miratuar një dekret të ri emergjence në lidhje me situatën e krijuar nga koronavirusi.
Bëhet me dije se Italia do të ofrojë më shumë se 400 miliardë euro likuiditet dhe kredi bankare për kompanitë e goditura nga kjo krizë.
Ky legjislacion do t’i lejojë bankat të ofrojnë kredi në vlerë më shumë se 750 miliardë euro, në përpjekje për të ndaluar rënien e ekonomisë.
“Nuk mbaj mend masa të tilla të fuqishme që janë prezantuar në historinë e republikës sonë për të ndihmuar në financimin e bizneseve tona”, tha kryeministri Giuseppe Conte në fund të takimit të kabinetit.
Ai premtoi një paketë të mëtejshme në fund të këtij muaji për të ndihmuar personat më të dëmtuar financiarisht nga epidemia.
Thesari do të mbrojë bankat nga humbjet në 90% të kredive për të gjitha kompanitë, një lëvizje kjo që pritet të injektojë rreth 200 miliardë euro në ekonomi. Garancia mund të shtrihet në 100% të humbjeve të mundshme për kredi që nuk kalojnë 25,000 euro.
