Qeveria e Kosovës ditën e sotme mori vendimin për të rihapur kufirin me Shqipërinë.
Me propozimin e Ministrit të Shëndetësisë, Armend Zemaj, të gjithë qytetarët që hyjnë në Kosovë nuk do të vetëizolohen.
“Ministria e Shëndetësisë së bashku me IKSHP-në ka konstatuar situatë të qëndrueshme, por me rritje të lehtë të rasteve me COVID-19.
Duhet ta kemi të qartë se virusi është ende aktiv.
Që nga dita e hënë propozoj që qytetarët që hyjnë në Kosovë nuk do t’i nënshtrohen vetëizolimit dhe në vend të testimit për ata që hyjnë do të jetë kontrolli i detajuar. Kërkojmë që të zbatohen me përpikmëri rekomandimet”, deklaroi Zemaj.
Gjithashtu, Ministri i Infrastrukturës, Arban Abrashi ka propozuar që të nisin konsultimet për hapjen e fluturimeve.
“Në këtë pjesë, mendoj se edhe hapja e fluturimeve është mjaft e rëndësishme.
Prandaj me lejen e juaj do të kisha filluar konsultimet me Autoritetin e Aviacionit Civil me MSH-në dhe kompanitë ajrore që të rifillojnë fluturimet duke zbatuar masat ndaj COVID-19 në mënyrë që të marrim një miratim”, u shpreh ai.
