Një ditë më parë, Këshilli i Ministrave miratoi vendimin që i hap dritën jeshile Gardës, për të përdorur mjete të blinduara rast pas rasti sipas vlerësimit të Ministrit të Brendshëm. Sipas VKM-së në pikat 7 dhe 8, këto mjete të blinduara përdoren nga Garda e Republikës për shërbime të veçanta.
“Mjetet e pauniformuara kanë në përbërje sisteme portative, të sinjalizimit pamor dhe zanore të alarmit. Përdorimi i mjeteve lëvizëse motorike dhe i mjeteve të blinduara për shërbime të veçanta kryhet sipas përcaktimeve të lidhjes nr.2, që i bashkëlidhet këtij vendimi dhe është pjesë përbërëse e tij.
Ngjyra, logoja dhe disenjoja në mjetet e Gardës së Republikës janë unike, dhe me të drejtë përdorimi vetëm nga Garda e Republikës së Shqipërisë. Të gjitha mjetet janë të kompletuara me pajisje speciale për sigurimin e jetës e realizimin e detyrës. Garda e Republikës, për shërbime të veçanta, përdor mjete lëvizëse të blinduara. Numri limit i mjeteve, afati përdorimit të tyre dhe limiti vjetor kilometrik miratohen me urdhër të Ministrit të Brendshëm. Ngarkohen Ministria e Brendshme dhe Garda e Republikës së Shqipërisë për zbatimin e këtij vendimi”, thuhet në vendim.
Po ashtu, dje qeveria ka miratuar edhe përcaktimin e simboleve, të uniformës, të shenjave dalluese dhe normave të veshmbathjes së punonjësve të Gardës së Republikës së Shqipërisë. “Flamuri dhe stema e Gardës së Republikës janë sipas lidhjes nr.2, që i bashkëlidhet këtij vendimi dhe është pjesë përbërëse e tij. Uniforma për punonjësit e Gardës së Republikës është sipas lidhjes nr.3, që i bashkëlidhet këtij vendimi dhe është pjesë përbërëse e tij. Për shërbime të veçanta, punonjësit e Gardës përdorin veshje civile; Shenjat dalluese të Gardës së Republikës janë sipas lidhjes nr.4, që i bashkëlidhet këtij vendimi dhe është pjesë përbërëse e tij”, thuhet në VKM.
