Në rrjetet sociale u publikuan disa fotot të një makine në hyrje të Ministrisë së Brendshme, prej ku pretendohet se po shkarkoheshin ndihmat për të prekurit nga tërmeti i 26 nëntorit.
Lidhur me këtë rast ka reaguar ministri i Brendshëm, Sandër Lleshaj, i cili shkruan se ato qese janë prova materiale.
Përmes një postimi në “Facebook”, Lleshaj shkruan që ato qese po shkojnë në depon e provave materiale të SHÇBA, pasi iu sekuestruan një personi që i kishte vjedhur.
“Edhe korbat kemi mangut….
Teksa jam në Kurbin, në punë për menaxhimin e gjendjes së rëndë, më njoftojnë se disa pisa pa nder dhe dinjitet kanë publikuar një mashtrim të ulët.
Patjetër që duhet të jenë me shumë përvojë në poshtërsira, përderisa imagjinata perverse e tyre prodhon turpe të tilla.
O të mjerë! Ato qese, që kanë ngazëllyer maninë tuaj perverse, janë prova materiale, që i janë kapur një hajduti si puna juaj dhe nuk po shkojnë në zyrën e Ministrit të Brendshëm, por në depon e provave materiale të SHÇBA, struktura që po kryen hetimin në zbatim të detyrave të prokurorit përgjegjës.
Për këtë turp, tani keni dy rrugë:
Ose të provoni lajmin e rremë, ose të jepni llogari deri në një para ligjit, si mashtrues ordinerë, që shfrytëzoni gjendjen e rëndë për të bërë biznesin e ndyrë me lajme të rreme.
Zgjidhni…..”, shkruan Lleshaj.
