Një i ri shqiptar mbeti vrarë mbrëmjen e së mërkurë në lagjes “Exarchia” në Athinë. Nga të dhënat u bë e ditur se viktima është 23-vjeçari shqiptar Mihal Kapurani nga Korça.
Ndërsa sot mediat greke shkruajnë se autoritetet e vendit fqinj kanë zbardhur skemën e krimit të vrasjes së 23-vjeçarit shqiptar në Athinë mesnatën e 25 Prillit.
Sipas policisë greke, i riu shqiptar me dokumente greke, u përplas me disa shqiptarë të tjerë, ndoshta për shkak të pazareve të drogës. Sherri mes tyre nisi në një lokal në lagjen “Exarchia” të kryeqytetit grek.
Më pas konflikti mes grupit të të rinjve u zhvendos në një tjetër zonë disa metra më larg, pikërisht aty ku u gjet i vrarë edhe 23-vjeçari. Ky i fundit ishte qëlluar pesë herë me thikë, duke humbur jetën nga gjakderdhja.
Sipas hetimeve të policisë, autorët dyshohet se janë gjithashtu shqiptarë. Disa dëshmitarë i thanë policisë se kishin dëgjuar që njëri nga grupi i të rinjve të thoshte “qëlloje të mbarojmë punë”. Sipas tyre, kanë qenë 6 persona të maskuar me të cilët u konfliktua 23-vjeçari shqiptar, disa prej të cilëve kishin armë në duar.
Motivet deri tani mendohet se kanë qenë konfliktet për prishjen e pazareve të drogës. Deri më tani kanë dëshmuar në Policinë e Athinës tre persona, shkruajnë mediat greke, mes të cilëve edhe vëllai i viktimës.
Ndërsa policia ka bërë të ditur se një shtetas me origjinë nga Përmeti, banor i Athinës, si dhe dy shtetas të tjerë shqiptarë me banim në Shqipëri,mund të jetë agresorët të cilët kanë hyrë në kufirin grek pak ditë më parë.
Identitetet e të dyshuarve u janë dërguar pikave kufitare me Shqipërinë, si dhe Policisë shqiptare. Ndërkohë po vijojnë hetimet për zbardhjen e shkaqeve të vrasjes. TIRANA TODAY
