Ish-presidenti i SHBA-ve, Bill Clinton ka folur sa i takon skandalit të tradhtisë me Monica Lewinsky.
Ai ka folur në lidhje me këtë në një dokumentar të titulluar “Hillary”, që tregon jetën e çiftit Clinton në vitet ‘90. Bill Clinton shprehet se ndihet “tmerrësisht keq” rreth kësaj romance.
Ish-presidenti tha se marrëdhënia me Lewinsky nisi si rezultat i dëshirës për të përballuar presionin, zhgënjimin dhe frikën.
“Ndonjëherë bëjmë gjëra që nuk duhet t’i bëjmë. Ishte e tmerrshme çfarë bëra”, thotë ai në dokumentarin “Hillary”.
Marrëdhënia e tij me Monica-n, asokohe 22 vjeçe, u pasua me akuzën e Dhomës së Përfaqësuesve për abuzim me pushtetin, por më pas Senati vendosi ta lironte ish-presidentin nga akuzat. Marrëdhënia e tyre e fshehtë zgjati rreth viteve ’95-’97, në kohën kur Monica Samille Lewinsky punonte si praktikante në Shtëpinë e Bardhë, për t’u bërë më pas publike në vitin 1998.
“Emri im është Monica Lewinsky. U dashurova me shefin tim, ashtu si do të bënte çdo 22-vjeçare. Shefi im ishte presidenti i Shteteve të Bashkuara. Jam penduar për shumë arsye. Një prej të cilave është se shumë njerëz u lënduan. Brenda natës u shndërrova nga një person krejtësisht privat në një të turpëruar publikisht përmes internetit. Isha zero. Pata periudha që mendoja vetëvrasjen. U bëra e varur nga gjalpi i kikirikut dhe karamelet M&M, ndërsa mendimi më i shpejtë ishte: Dua të vdes”, tha aktivistja dhe stilistja amerikane 5 vite më parë, raporton CNN.
