Presidenti rus, Vladimir Putin deklaroi para samitit të G20 në Osaka të Japonisë se ai dhe homologu i tij amerikan, Donald Trump kanë urdhëruar ministrat e tyre të Jashtëm, që të nisin konsultimet mbi kontrollin e armëve bërthamore.
Ndërkohë, Trump tha në një prononcim për mediat se në takimin që zhvilloi me Putin kishin biseduar gjatë në lidhje me kontrollin e armëve.
“Presidentët janë pajtuar që dy shtetet duhet të vazhdojnë bisedimet në një model të shekullit 21 për kontrollin e armëve, për të cilin, presidenti Trump ka thënë se është e nevojshme që në këto bisedime të përfshihet edhe Kina”, thuhet në deklaratën e Shtëpisë së Bardhë.
Kontrolli i armëve bërthamore është bërë një çështje shqetësuese, sidomos pasi Uashingtoni më herët gjatë këtij vitit akuzoi Rusinë për shkeljen e Traktatit të Forcave Bërthamore me Rreze të Mesme Veprimi dhe u tërhoq nga kjo marrëveshje.