Tre shqiptarë ranë në prangat e policisë britanike, pasi u kapën duke u kujdesur për fermat e kanabisit në tre banesa në Hull.
Bëhet fjalë për Halit Mazreku, 24 vjeç, Elson Zani, 23 vjeç dhe Kristjan Kola, 22 vjeç. Të tre të rinjtë kishin hyrë në vend, të fshehur në kamionë dhe nuk ishin në gjendje të paguanin borxhet e tyre personave që i ndihmuan për të hyrë në rrugë ilegale në Britaninë e Madhe.
Prokurori David McGonigal tha se në secilën pronë policia gjeti kanabis të kultivuar, në kushte të kontrolluara me drita dhe të tjera objekte që shërbenin për rritjen e lëndës narkotike.
Mazreku deklaroi se zgjodhi të bënte këtë punë për të “paguar për kalimin e tij”. Po ashtu, ai është pyetur edhe nëse mendon se banda do të lëndojë familjen e tij. Në lidhje me këtë, shqiptari tha: “Unë e kam nënën time vetëm, kështu që mendoj se po.”
Po ashtu, prokurori David McGonigal u shpreh: “Nëna e tij i tha se ishte kërcënuar.”
Ndërkohë, Kristjan Kola dëshmoi qëfillimisht kishte punuar në lavazh, por nuk po fitonte aq sa duhet për të paguar borxhin e tij. Sa i përket të arrestuarit tjetër, Elson Zani mohoi të kishte dijeni për fermën e kanabisit, duke thënë se kishte fjetur në pronën ku ishte arrestuar.
Më vonë, të tre të rinjtë pranuan prodhimin e kanabisit, ndërsa Zani gjithashtu u deklarua fajtor për vjedhjen e energjisë elektrike. Mazreku dhe Kola nuk kishin asnjë dënim të mëparshëm, ndërsa Zani kishte dënime për kundërvajtje drejtimi dhe mbajtje të kokainës dhe kanabisit.
