Punoj në shtet dhe privat, s’kam fshehur asgjë/ Mjeku Prifti flet para gjykatës

Mjeku kardiokirurug i QSUT-së, Edvin Prifti, tashmë i pezulluar nga detyra, është shfaqur paraditen e sotme në gjykatë.

Gjatë fjalës së tij në seancën gjyqësore, ai deklaroi ka punuar në Itali dhe se të ardhurat e tij, kanë qenë shumë të mira.

Ai u shpreh se nuk ka asgjë për të fshehur, pasi ka operuar mijëra shqiptarë.

“Kam mbaruar me medalje ari, specializim në Siena dhe La Sapienca diplomimin si specialist në kardiokirurgji, punova në San Kamilo, doktoraturë La Sapienca, kam pasur të ardhura shumë të mira në Itali”, është shprehur Prifti në sallën e gjyqit. S’kam fshehur asnjë gjë. Punoj privat dhe shtet. U befasova nga Prokuroria që kërkoi burg, kam operuar mijëra shqiptar”, tha ai.

Më herët po gjatë ditës së sotme, Prokuroria ka kërkuar masën e sigurisë ”Arrest me burg” për mjekun Prifti. Mësohet se atij i është shtuar dhe akuza për pastrim parash.

Hetimet ndaj tij nisën bazuar në përgjimet e sekretares së Gjykatës së Krujës, të cilat kishin nisur për lirimin e të dënuarve por që kanë zbuluar për Prokurorinë e Posaçme edhe korrupsionin në shëndetësi.

Nga përgjimet, ka rezultuar se sekretarja e Gjykatës, Manuela Mallkuçi, i ka dhënë para kirurgut Edvin Prifti, me qëllim që ky i fundit të bënte operacion nënën e saj.

Kontrolli i kryer pasditen e të enjtes, 11 shkurt në banesën e tij zbuluan 250 mijë euro dhe 16 milionë lekë në zyrën dhe banesën e kardiologut të njohur.