Hazbi Kasaj është kandidati i pavarur, i cili ka shpallur kandidaturën për kryetar bashkie në qytetin e Këlcyrës.
Ai është anëtar i partisë “Zgjidhja” e Koço Kokëdhimës, por në këto zgjedhje nuk do të kandidojë nën siglën e partisë. Në një intervistë për Fax News, Kasaj shkrin së qeshuri gazetaren, teksa prezanton sloganin e tij, i cili është: “Puno pak, ha shumë dhe bëj qejf”.
Ai thotë që i ka prezantuar një platformë qytetarëve të Këlcyrës, në të cilën ai do të lidhë një kontratë ligjore me votuesit përpara zgjedhjeve duke i siguruar atyre 2300 vende pune.
“Slogani im për Bashkinë e Këlcyrës “Puno pak, ha shumë dhe bëj qejf”. Unë i kam qejf dhe personat që nuk punojnë. Në Bashkinë e Këlcyrës do shpall 2300 vende pune. Do lidhet një kontratë pune me qytetarin para se unë të bëhem Kryetar Bashkie dhe do të më votojnë mua. Ka punë për të gjithë ata që duan punë, kush e quan mashtrim do të dënohet”, thotë Kasaj.
Kasaj thotë që nuk e ka pyetur Kokëdhimën për kandidaturën e tij, por se ai është dakord.
“Në 2021 kur Koço të kandidojë unë do votoj për të, por për kandidaturën e tanishme unë nuk e kam pyetur. Me Koçon jemi takuar në Tiranë, flasim ditë për ditë. Koço Kokdhima është dakord me zgjedhjen time. Po të më kishte pyetur mua Koço emrin partisë nuk do ja vinte “Zgjidhja”, por “Lidhe Zgjidhe”, vijoi më tej Kasaj.
Për sa i përket rivalëve të tij Kasaj thotë që nuk i trembet kreut aktual Klement Ndonit dhe kandidaturës së PD-së.
“Nuk i trembem kryetarit aktual Klement Ndoni si rival për Kryetar Bashkie. Është djali i mirë, por nuk i udhëheq dot njerëzit. Si Klementi, si kandidati i PD-së janë bufa, po të votosh për bufa do bëhesh buf. Edi Ramës nuk i mungon asgjë, ka arritur çdo gjë me zgjuarsi. Njerëzit janë të pakënaqur, kam 7 muaj që mbledh firma.” përfundoi Kasaj.
