Zyra e zv/kryeministrit, në cilësinë e drejtuesit të Task-Forcës ka referuar në Prokurorinë e Përgjithshme informacionin e verifikuar më parë nga grupi i kontrollit se shoqëria Ujësjellës Kanalizime ka punësuar 18 shtetas pas datës 26 maj, si dhe janë larguar 7 në shkelje të Kodit Elektoral.
Informacioni është verifikuar edhe nga Drejtoria e Tatimeve, ndërsa zyra e zv/kryeministres Mandija njofton se ka dyshime që janë konsumuar elementët e veprës penale të shpërdorimit të detyrës si dhe korrupsionit aktiv në zgjedhje parashikuar ne Kodin Penal.
Gjithashtu, në njoftim thuhet se Task Forca nxit paanshmërinë dhe trajtimin e barabartë të kandidatëve e partive politike në marrëdhëniet me administratën shtetërore dhe burimet e saj, për krijimin e kushteve të drejta e të barabarta për të gjithë kandidatët dhe partitë politike në procesin elektoral, si dhe mospërdorimin e fondeve dhe burimeve publike për qëllime partiake.
