Ministrja e Shëndetësisë dhe Mbrojtjes Sociale, Ogerta Manastirliu ka shpërndarë në Facebook foton e një infermiereje që merret me trajtimin e të infektuarve nga koronavirusi në spitalin Infektiv.
Ministrja lavdëron punën që mjekët dhe infermierët kanë bërë që nga shpërthimi i koronavirusit në vend.
“Kimete Zgura shërben me përkushtim e profesionalizëm në spitalin infektiv, e palodhur si i gjithë stafi infermieror i këtij spitali, që çdo ditë përballen me #COVID19, me misionin për të shpëtuar jetë. Punë #heroike e infermierëve të Infektivit”, shkruan ajo në postimin e saj.
Ndërkohë 28 raste të reja infektimi u konfirmuan ditën e sotme në vend, duke e çuar numrin total në 361. Mes rasteve të konfirmuara sot ishte edhe një fëmijë.
Sa i përket të shëruarve, numri i tyre ka shkuar në 104. Ndërsa deri më tani 20 persona kanë ndërruar jetë nga virusi vdekjeprurës.
