Gazetari Alfred Lela shprehet se do ngre padi në gjykatë, referuar dhunës së ushtruar ndaj tij, gjatë protestës kundër shembjes së Teatrit Kombëtar.
Ai ka bërë publik akt-ekspertizën e mjekut ligjor shtetëror, që konstaton një sërë shenjash dhune. Bashkëngjitur saj, ai ka shkruar:
“Eksperti mjeko-ligjor (i shtetit) ka parë këto shenja dhe të tjera, që specifikohen në raportin zyrtar, që Rama, Lleshi e të tjerë lokalë, por edhe ndërkombëtarët, të cilat e ngrenë zërin edhe për macet e humbura, nuk ua kanë zënë sytë. Ja ku i kanë, në rrugë e sipër për në gjykatë. Ndoshta nuk i sheh as gjykata. Të gjithë këta bashkë mund të mos kenë sy, por, sa për vete, atë zë që kam nuk ma heshtin dot”.
Kujtojmë këtu se Alfred Lela ka qenë prezent në vijën e parë të kordonit policor, kur mbështetësit e Teatrit, tentuan të çanin rrethimin e ti afroheshin godinës.
Në muajin maj, kur ishte i ftuar në studion e “Real Story”, në News24, Lela rrëfeu me detaje çfarë kishte ndodhur. Ai tha se nuk do e lërë me kaq këtë çështje, dhe se do e çojë deri në Departamentin Amerikan të Shtetit.
