SHBA dhe aleatët e saj kanë përgatitur një listë të elitave ruse, të lidhura me rrethin e brendshëm të Vladimir Putin, për të goditur me sanksione ekonomike nëse Rusia pushton Ukrainën, ka thënë një zyrtar i lartë i administratës amerikane.
Zyrtari, i cili foli për “Reuters” në kushte anonimiteti, tha se individët “luajnë një rol në vendimmarrjen e qeverisë, ose janë së paku bashkëfajtorë në sjelljen destabilizuese të Kremlinit”.
Sanksionet do të synojnë gjithashtu anëtarët e familjes, tha zyrtari. Synimi i oligarkëve rusë është vetëm një pjesë e një plani të SHBA-së dhe aleatëve të saj, për të ndëshkuar Putinin nëse ai fillon një pushtim. Rusia mohon se ka në plan të pushtojë Ukrainën.
Zyrtari amerikan tha se shumë nga individët janë objektiva veçanërisht të cenueshëm, për shkak të lidhjeve të thelluara financiare me perëndimin. “Shokët e Putinit nuk do të jenë më në gjendje të përdorin bashkëshortet e tyre, ose anëtarët e tjerë të familjes si përfaqësues për t’iu shmangur sanksioneve. Sanksionet do t’i shkëputnin ata nga sistemi financiar ndërkombëtar, dhe do të siguronin që ata dhe anëtarët e familjeve të tyre nuk do të jenë më në gjendje të gëzojnë përfitimet e ‘parkimit’ të parave të tyre në perëndim dhe ndjekjen e universiteteve elitare perëndimore”, shtoi zyrtari.
Burimi i lajmit: The Guardian. Përshtatur nga Tirana Today
