A mund të jetë një përgjigje imune më specifike, “çelësi” për të shmangur simptomat më të rënda nga Codid-19?
Këtë duket se sugjeron një studim, që krahasoi reagimin e sistemit imunitar të të rriturve dhe fëmijëve, në përpjekje për të kuptuar se përse këta të fundit, me të njëjtën ngarkesë virale, zhvillojnë në përgjithësi sëmundje në një formë më pak shqetësuese.
Sipas studimit të botuar në “Science Translational Medicine”, ndryshimi ka të bëjë me linjën e ndryshme mbrojtëse që përdoret nga sistemi imun i fëmijëve kundër infeksionit SARS-CoV-2: një mekanizëm më elementar dhe më i paspecifikuar, por që duket se e mbron fëmijën nga një përparim më serioz i sëmundjes.
Të rinj dhe të rritur
Një grup shkencëtarësh nga Kolegji i Mjekësisë Albert Ajnshtajn dhe Spitali i Fëmijëve Montefiore në Nju Jork në bashkëpunim me Universitetin e Jeilit, studiuan 60 pacientë të rritur dhe 65 “fëmijë” (nën moshën 24-vjeç) të infektuar me Covid-19 midis muajve mars dhe maj 2020.
Njëzet pacientët e grupit të dytë kishin zhvilluar MIS-C (Sindromën Inflamatore Multisistemike të Fëmijëve), sëmundja inflamatore që prek enët e gjakut dhe që është ndër ndërlikimet e mundshme të Covid-19 tek moshat e reja. Analizat u fokusuan tek llojet e ndryshme të qelizave imune të zhvilluara nga pacientët, antitrupat dhe proteinat inflamatore, citokinat, të prodhuara si reagim ndaj infeksionit.
Imunitet jo-speficik por shumë efikas
Simptomat e sëmundjes ishin më të buta tek fëmijët dhe adoleshentët. Vetëm pesë prej tyre (8 për qind) kishin nevojë për maskë oksigjeni, ndryshe nga të rriturit, ku për të kishin nevojë 22 (37 për qind). Vdekjet në grupin e fëmijëve ishin vetëm 2 (3 për qind), kundrejt 17 në grupin e “të rriturve” (28 për qind). Asnjë nga pacientët me MIS-C nuk vdiq.
Sipas autorëve të studimit, fëmijët reaguan më mirë falë një imuniteti më të fuqishëm të lindur ose jo-specifik, linja e parë mbrojtëse e organizmit, ajo që reagon më shpejt, por në një mënyrë jo të specializuar ndaj pushtimit të patogjenëve.
Kjo formë e imunitetit është më e qëndrueshme në një moshë të re, para se sistemi imunitar ende i papjekur të ketë formuar një depo “kujtimesh” mbi sëmundjeve që tashmë ka kaluar. Imuniteti adaptiv ose specifik, linja e dytë mbrojtëse e sistemit imunitar, që përmban antitrupa dhe qeliza të specializuara imune, është një përmirësim i reagimit të parë që mund të rezultojë “nga përvoja” ose që mund të stimulohet në mënyrë artificiale nga një vaksinë.
Shumë zell
Pacientët fëmijë të prekur nga Covid-19, treguan nivele shumë më të larta të disa citokinave – si IL-17A – të shoqëruara me përgjigjen imunitare të lindur. Studiuesit thonë se këto proteina mund të mbrojnë kundër Sindromës të Frymëmarrjes së Rënduar Akute (ARDS), një nga ndërlikimet më të frikshme që shkakton ky virus.
Ndërkaq në mënyrë paradoksale, nivelet e antitrupave specifikë neutralizues kundër SARS-CoV-2 ishin më të larta tek pacientët e rritur që kishin vdekur apo që kishin nevojë për ventilim mekanik, si në krahasim me të rriturit e tjerë me simptoma më pak të rënda, ashtu edhe në krahasim me fëmijët.
“Këto rezultate sugjerojnë se format më të rënda të Covid-19 tek të rriturit, nuk shkaktohen nga dështimi i imunitetit të tyre adaptim, për të prodhuar një antitrup apo reagim të qelizave T”- thotë Kevan Herold, një nga autorët e studimit. “Përkundrazi, pacientët e rritur i përgjigjen infeksionit të koronavirusit përmes një përgjigje imune tepër të fuqishme adaptive, e cila mund të nxisë inflamacionin e lidhur me ARDS”.
Plazma dhe vaksinat
Nëse konfirmohet, ky zbulimi mund të ketë ndikime të mëdha mbi terapitë që po eksperimentohen kundër Covid-19. “Pacientët tanë të rritur që kishin rezultate të dobëta, kishin nivele të larta të antitrupave neutralizues, dhe kjo gjë sugjeron se plazma konvaleshente, e cila është e pasur me antitrupa neutralizues, nuk i ndihmon dot të rriturit që tashmë kanë zhvilluar shenja të ARDS, Sindroma e Frymëmarrjes së Rënduar Akute”. Shumica e vaksinave të testuara kundër Covid-19, synojnë gjithashtu stimulimin e antitrupave neutralizues. “Ne mund të shqyrtojmë vaksinat që promovojnë imunitet në mënyra të tjera, për shembull duke rritur përgjigjen imunitare të lindur”- thonë studiuesit.
Burimi i lajmit: https://www.focus.it/scienza/salute/perche-il-sistema-immunitario-dei-bambini-risponde-meglio-alla-covid
Përshtati TIRANA TODAY
