Shkodra vijon të jetë një vatër infeksioni. Në raportimin e fundit të Ministrisë së Shëndetësisë, u konfirmuan me Covid-19 edhe 11 persona. Me këtë shifër, Shkodra pa frikë konsiderohet si vatra më e nxehtë e infeksionit të Shqipëri, me një total prej 94 rastesh.
Po kështu, vazhdon të rritet kurba e të infektuarve në vend. Në 24 orët e fundit janë testuar 253 persona të dyshuar me COVID-19. Nga rezultatet e testimeve janë konfirmuar 21 raste pozitive me COVID-19. Nga rastet e reja, 11 i përkasin Shkodrës, 4 raste në Tiranë, 4 raste në Krujë dhe Kurbini me 2 raste.
Shpërndarja gjeografike e rasteve pozitive:
– Tiranë 245 raste
– Durrës 42 raste
– Lushnje 6 raste
– Elbasan 16 raste
– Fier 35 raste
– Kavajë 9 raste
– Rrogozhinë 4 raste
– Korçë 19 raste
– Vlorë 5 raste
– Shkodër 94 raste
– Lezhë 14 raste
– Berat 2 rast
– Has 13 raste
– Krujë 11 raste
-Tropojë 4 raste
– Pukë 5 raste
– Mirditë 3 raste
– Kukës 9 rast
-Mallakastër 1 rast
– Kurbin 2 raste
Pak ditë më parë, mjeku i njohur Pëllumb Pipero, gjatë një interviste në emisionin ‘Open’ tha se në Shkodër qytetarët nuk kanë respektuar masat. Ndaj ka pasur shumë raste të konfirmuara me koronavirus. Mjeku ka thënë se ai ka informacion se qytetarët kishin shkuar nëpër lokale dhe në ceremoni mortore.
“Shkodrën do ta konsideroja si një rast të veçantë. Unë mendoj që në tërë këtë menaxhim, dy janë indikatorë të rëndësishëm që tregojnë ecurinë e saj: së pari gjurmimi i rasteve pozitive dhe së dyti është respektimi i masave të qeverisë.
Mesa duket, njëra nga këto hallka, në mos të dyja kanë çaluar. Unë kam informacion se gjurmimi ka vazhduar me intensitet në Shkodër. Ndërkohë kam informacion se qytetarët nuk kanë respektuar masat. Kanë marrë pjesë në varrime, kanë frekuentuar lokalet. Është situatë që duhet të analizohet nga epidemiologët”.
