Nga: Marsela Sinani
Të jesh modele e Guccit, është si të marrësh një trofe e ndërsa konkurrenca mes femrave çdo ditë po bëhet edhe më sfiduese. Një 23-vjeçare ka rënë pre e bullizmit. Armine Harutyunyan është një artiste dhe modele, e cila është përzgjedhur për të reklamuar artikujt e firmës së njohur Gucci.
Ajo është aktualisht modelja më e klikuar e momentit, pasi sipas ndjekësve në rrjetet sociale, nuk përputhet me standardet e bukurisë. Armine Harutyunyan ka një fytyrë të mprehtë, hundë të gjatë, vetulla të trasha të zeza.
Gucci e përzgjodhi për këto karakteristika: për diversitet, për të ndezur diskutimet e për të promovuar një lloj tjetër bukurie.
Sociologia Entela Binjaku shprehet se deri diku ka qënë e pritshme, pasi shoqëria jonë ka nisur të tregojë më shumë interes për aspektin fizik. Kjo duket në mënyrën si trajton fizikun, dhe si ka nisur të kujdeset për pamjen.
Mos vallë koncepti i së bukurës, ka ndryshuar me evoluimin e shoqërisë? Për këtë sociologia thotë se bukuria nuk është një koncept absolut.
E rekrutuar nga shtëpia prestigjioze Gucci vitin e kaluar për javën e modës në Milano, Armine Harutyunyan u cilësua kohët e fundit po nga kjo kompani si një nga 100 modelet më seksi në botë. Kjo ka shkaktuar një shpërthim nga ndjekësit në rrjetet sociale, të cilët e kanë kundërshtuar vlerësimin.
“Në fjalorin e gjuhës shqipe, bukuria përkufizohet si: tërësia e anëve dhe e tipareve të bukura që ka një njeri, një send etj., të cilat të tërheqin e të ngjallin kënaqësi; pamja e jashtme e bukur ose cilësitë e brendshme, shpirtërore e morale të bukura.
Bukuri trupore (fizike). Bukuri shpirtërore (morale). Me bukuri të rrallë. Bukuria e fytyrës. Bukuria e bregdetit (e detit, e maleve tona, e pranverës). Bukuria e luleve. Yll nga bukuria. Humbi bukurinë. Ia shton bukurinë.
Pra bukuria qëndron në cilësitë e një personi apo të një sendi, që duke i parë na japin kënaqësi dhe na ngazëllejnë mendjen dhe shpirtin. Por njerëzit e kanë përkufizuar bukurinë në shumë mënyra.
Ka bukuri që gjenden tek e papërsosura, ka bukuri që gjenden tek e veçanta apo tek e thjeshta. Ka bukuri që i zbulojmë kur jemi të lumtur, sepse është qetësia e brendshme dhe gëzimi që ndjejnë që na bën të shohim të bukurën tek ajo që na rrethon.
Shoqëria jonë ka nisur të tregojë më shumë interes për aspektin fizik. Kjo duket në mënyrën si trajton fizikun dhe si ka nisur të kujdeset për pamjen. Ka njerëz që aspektet e fizikut i kanë të ndërthurura në mënyrë shumë harmonike, siç ka edhe të tjerë që investohen në kohë, para dhe energji për të arritur këtë.
Shumica prej nesh provojnë tërheqje për njerëzit me tipare të bukura, dhe në harmoni me njëra-tjetrën. Por sërish bukuria është subjektive: ajo që mund të jetë e bukur për dikë, nuk është për dikë tjetër. Siç ka edhe njerëz që ndoshta fizikisht nuk kanë ndonjë bukuri, e megjithatë janë tërheqës për sytë e të tjerëve, gjë e cila vjen nga bukuria e brendshme”, shprehet sociologia Entela Binjaku.
TIRANA TODAY
