Dita e sotme nuk ka qenë aspak e zakonshme për dyert e politikës shqiptare. Ajo nisi me një mesazh të Kryeministrit Rama në rrjetin social “Twitter”. Rama ka bërë me dije, ata pak ndjekës, se ka pranuar dorëheqjen e Ministrit të Brendshëm Fatmir Xhafaj nga ky post dhe ka emëruar në vend të tij një gjeneral. Një gjeneral të larguar dikur nga detyra sepse kishte guxuar të kundërshtonte Ministrin e Mbrojtjes së asaj kohe, Arben Imami dhe ish-Kryeministrin Sali Berisha.
Të errëta arsyet se pse kryeministri, rreth orës 08:25 min., zgjodhi që një zhvillim kaq të rëndësishëm, me shumë impakt, ta bëjë publik në “Twitter”, ku nuk ka më shumë se 330 mijë ndjekës. Si të ishte shumë më e rëndësishme, po në orën 08:25 min., në faqen e tij zyrtare në “Facebook”, ku ka më shumë se 1 milion ndjekës, ai ka postuar një publikim të “Lonely Planet” ku sugjerohej Shqipëria si vend i cili duhet vizituar gjatë vitit 2019. Më pas Kryeministri ka vazhduar, i pashqetësuar në dukje, rrugën për në Lushnje.
Ndërkohë në Tiranë mediat kërkonin përgjigje për shumë pikëpyetje, kërkonin përgjigje për arsyen e dorëheqjes së Ministrit që kishte pasur, si askush tjetër, edhe mbështetjen e Amerikanëve.
Zhvillimet e mëpasme të ditës do të vazhdonin me postimin e Fatmir Xhafajt, po në “Twitter”. Xhafaj shprehte falënderime për stafin dhe bashkëpunëtorët, por edhe ky nuk bëri publike ndonjë arsye për dorëheqjen.
Situata gri apo terri informativ duket krijuan terrenin për pandehma. Dikush u kujdes të emetonte në rrjetet sociale lidhjen e Xhafës me një histori rozë, ndërsa një deputet blu emetoi versionin sipas të cilit bandat jashtë qeverie po godisnin ato në qeveri, duke aluduar me faktet që do të dilnin në konferencën e lajmëruar për shtyp të ish-ministrit të Brendshëm, Saimir Tahiri. Të tjerë lëshuan pandehma se ruajtja e kokës së Vangjush Dakos, kryebashkiakut të Durrësit, preu kokën e ministrit Xhafaj etj.
Në këtë pikë situatën nuk e ndihmon dot as togfjalëshi i Kryeministrit sipas të cilit ministri i ri “do te sillte energji të re pozitive”, pasi kohët e fundit, me dy operacionet e njohura në Shkodër dhe Shijak si dhe me arrestimin e dy ish-deputetëve të akuzuar për afera korruptive, Ministri Xhafaj ishte krejt në rregull me sjelljen e energjisë pozitive.
Pra, në gjithë këtë histori, ashtu si edhe në disa raste të tjera parakaluese, Kryeministri Rama mbetet larg detyrimit të vet përpara votuesve, por edhe gjithë shqiptarëve, për të qenë transparent.
Një transparencë e munguar që bëhet shkas për një mijë e një pandehma e thashetheme, pothuaj të gjitha me sfond të errët, që ilustrojnë më së miri situatën reale të politikës shqiptare të zhytur në korrupsion e llum.
Kështu që arsyeja e vetme që kryeministri nuk e thotë të vërtetën e largimit të Xhafajt është se ai nuk e thotë dot të vërtetën për këtë rast. Nuk e thotë dot sepse ajo do të jetë aq e shëmtuar, saqë mund të shkaktojë një tjetër furtunë antiqeveritare si ato me të cilat jemi regjur kohët e fundit./ N.D. TIRANA TODAY
