Një 23-vjeçar nga Tirana është arrestuar pas një konflikti me shoferin e një autobusi, për shkak të ‘shpejtësisë të ulët’.
Mësohet se ky shtetas kishte thyer masën e sigurisë “Arrest shtëpie”, duke dalë nga shtëpia ku më pas ka dhunuar edhe shoferin e autobusit. I dënuari e ka goditur me mjete të forta në fytyrë shoferin e autobusit, pas një konflikti të nisur nga “shpejtësia e vogël” e mjetit.
Njoftimi i policisë:
Shërbimet e Komisariatit të Policisë Nr.2, në vijim të punës për parandalimin, evidentimin dhe goditjen e paligjshmërisë, arrestuan në flagrancë shtetasin:A. K., 23 vjeç, banues në Tiranë (me precedentë të mëparshëm penal).
Shtetasi i mësipërm ka thyer masën e sigurisë “Arrest shtëpie” duke dalë nga shtëpia dhe më pas është konfliktuar për motive të dobëta (pse autobuzi nuk ecte shpejt), me shoferin e autobusit të një linje urbani duke e goditur me mjete të forta në pjesën e fytyrës.
Pas marrjes së njoftimit shërbimet e policisë kanë mbërritur menjëherë në vendngjarje ku dhe arrestuan në flagrancë shtetasin A. K., për veprat penale “Plagosje e lehtë me dashje” dhe “Largim i të burgosurit nga vendi i qëndrimit”.
