Nëse në Evropë fushata e vaksinimit është ngadalësuar kryesisht për shkak të mungesës së vaksinave (si dhe nga organizimi i dobët dhe alarmet shëndetësore), në botë ekziston një vend që prodhon vaksina me bollëk, por që është ende shumë prapa me vaksinimet:Kina, që ndonëse është në krye të renditjes për dozat e prodhuara nga vaksinat e saj, ka vaksinuar më pak njerëz sesa për shembull Shtetet e Bashkuara (e dyta në renditje për dozat e prodhuara).
Përqindjet dhe popullsia
Duhet theksuar se është një vend me thuajse 1.4 miliardë njerëz. Sigurisht nuk është i krahasueshëm me Italinë apo me ndonjë vend tjetër evropian, madje as me Shtetet e Bashkuara, të cilat kanë vetëm 330 milion banorë.
Por edhe duke pasur parasysh këtë ndryshim thelbësor, Kina duket se mbetet shumë prapa rivalit të saj perëndimor. Nëse flasim për doza vaksine të administruara, Shtetet e Bashkuara kishin realizuar deri më 14 mars107 milion; ndërsa deri më 20 mars Kina ishte në kuotën 70 milionë.
E analizuar kjo në raport me numrin e popullsinë, hendeku është edhe më i theksuar. Sipas OurWorld In Data, deri më 25 mars në Kinë ishin administruar më shumë se 6 doza për 100 njerëz, krahasuar me pothuajse 40 doza për 100 njerëz në Shtetet e Bashkuara (doza që nuk korrespondojnë domosdoshmërisht me numrin e përgjithshëm të të vaksinuarve, pasi disa vaksina kërkojnë 2 doza).
Po përse fushata e vaksinimit në Kinë po ecën me ritme kaq të ngadalta?Sipas “The Economist”, fushata e vaksinimit nuk është e tillë për shkak të rezistencës së kinezëve ndaj vaksinës. Përkundrazi, të dhënat tregojnë se 85 për qind e popullsisë është në favor të vaksinimit anti-Covid.
Pëkundrazi, një rol të rëndësishëm luan e ashtuquajtura diplomaci e vaksinave. Siç shpjegon “The Economist”, presidenti kinez Xi Jinping deklaroi majin e vitit të kaluar se vaksinat kineze do të ishin “një e mirë publike globale”. Kompanitë prodhuese kineze kanë nënshkruar kontrata me mbi 12 shtete të huaja për të eksportuar gjysmë miliardë doza, teksa qeveria kineze është zotuar t’i sigurojë ndihmë 53 vendeve për procesin e vaksinimit.
Diplomacia e vaksinave
Ky altruizëm i dukshëm, shpjegon gazeta britanike, është në fakt rezultat i një veprimi. Qeveria kineze i kreu testet e Fazës III të vaksinave të saj në disa vende (përfshirë Brazilin, Indonezinë, Pakistanin dhe Perunë), duke premtuar në këmbim furnizimin me përparësi me dozat e këtyre vaksinave.
Dhe kjo, për shkak se duke zhdukur pothuajse fare koronavirusin në vend, Kina nuk kishte mundësi të kryente teste në vend, pasi shanset për t’u infektuar me Covid-19 – dhe për të verifikuar kësisoj edhe efektivitetin e vaksinës – ishin (dhe janë ende) minimale.
Asnjë lloj nxitimi
Fakti që Covid-19 është thuajse çrrënjosur në Kinë, na çon tek argumenti i fundit:mungesa e urgjencës. Ndryshe nga bota perëndimore, ku qeveritë janë në luftë kundër kohës për të ndaluar përhapjen e SARS-CoV-2, në Kinë virusi është vendosur prej kohësh nën kontroll.
Në gjithë vendin ka pak më shumë se 160 raste aktive, ndaj popullata nuk ngutet të vaksinohet. Dhe megjithëse populli kinez nuk është kundër vaksinës, 1 në 3 qytetarë nuk e ndjen urgjencën për t’u vaksinuar pasi ata nuk e perceptojnë më kërcënimin nga Covid-19.
Sa më shumë që një vend është i rrezikuar, aq më shumë vaksina shihet si ilaçi shpëtimtar. Gjithsesi, duhet të kemi parasysh se që të kthehemi në normalitetin e dëshiruar, nuk mund të shihet vetëm oborri i shtëpisë. Pasi me këtë ritëm pjesa tjetër e botës do të arrijë imunitetin para Kinës, e cila do të mbetet e mbyllur në “kafazin e saj të artë”, dhe do të duhet të bindë qytetarët e saj se kështu nuk mund të vazhdohet më.
Ndërkohë Republika Popullore e Kinës, synon të vaksinojë 40 për qind të popullsisë deri në fund të korrikut 2021. Mbetet të shohim gjatë muajve të ardhshëm nëse do të mund ta arrijë këtë synim ambicioz.
Burimi i lajmit: https://www.focus.it/scienza/salute/cina-vaccinazioni-a-rilento
Përshtatur nga TIRANA TODAY
