Gazetari dhe moderatori i njohur Adi Krasta komentoi rolin e gazetarisë në situatën politike gjatë viteve.
I ftuar në “A2 CNN”, moderatori u shpreh se ky profesion është i vështirë në çdo vend të botës, por theksoi se ai vetë kurrë nuk ka punuar për militantët e partive.
Ndër të tjera, Krasta tha se: “Unë rezistoj pasi e di shumë mirë që do të vijë një mazhorancë tjetër në Shqipëri, ndërsa unë do të qëndroj po i njëjti”.
“Është e vështirë të kesh mendimet e tua dhe një platformë ku t’i shprehësh. Është e vështirë për të qëndruar, për të patur një qasje të caktuar, kështu që kolegët e mi bëjnë aq sa munden dhe atë që dinë.
Unë kurrë nuk kam punuar për militantët. Ajo që kam kuptuar unë në këto 30 vjet është që edhe urrejtja, edhe mbështetja e tyre politike është ciklike.
Kur ishim kundër Nanos, na donte PD-ja; kur kritikonim qeverinë Berisha, na donin socialistët.
Madje, tani ata thonë pse na ka tradhtuar ky? Nuk mund të pretendohet që apriori të kesh një shërbim të njëanshëm nga ana ime.
Unë rezistoj pasi e di shumë mirë që do të vijë një mazhorancë tjetër në Shqipëri, ndërsa unë do të qëndroj po i njëjti. Sapo të fillojnë veprimet që nuk janë në interes të publikut, në programet tona ne do i denoncojmë dhe të njëjtët militantë të PS-së do të na mbështesin sërish”, shtoi Adi Krasta.
