Kryetari i Bashkisë së Divjakës, Fredi Kokoneshi është plagosur këtë të premte me thikë nga Orges Xhelili. Ngjarja ka ndodhur rreth orës 09:30 afër godinës së Bashkisë. Kokoneshi dhe shoferi i tij Bullari janë dërguar menjëherë në Spitalin e Lushnjes. Sipas informacioneve paraprake, të dy të plagosurit janë futur me urgjencë në sallën e operacionit. Bluzat e bardha të Spitalit të Lushnjes kanë konfirmuar se të plagosurit janë jashtë rrezikut për jetën.
Shkak për plagosjen e kryebashkiakut të Divjakës është bërë lëvizja nga vendi i punës i gruas së autorit të ngjarjes, Ergest Xhelili. Ky i fundit, ish-punonjës i Bashkisë Divjakë në sektorin e Teknologjisë dhe Informacionit (IT) e ka bashkëshorten me profesion infermiere, raporton “Dosja”.
Por, atë ia kanë lëvizur nga spitali i Divjakës, gjë që ka sjellë dhe revoltimin e Xhelilit. Ky i fundit ka shkuar dhe i ka kërkuar llogari Kokoneshit, pasi pretendonte se kjo lëvizje ishte bërë me urdhër të tij.
“Pse më lëvize gruan nga puna” mësohet të ketë thënë Xhelili. Sherri ka agravuar dhe i riu ka qëlluar me thikë kryebashkiakun, ai ka plagosur edhe shoferin e Kokoneshit, Gazmend Bullari që ka ndërhgyrë për t’i ndarë. Të plagosurit ndodhen në spital, ndërsa Xhelili është vënë në pranga.
Kreu i grupit parlamentar të PS-së, Taulant Balla ka reaguar për plagosjen me thikë të kryebashkiakut të Divjakës, Fredi Kokoneshi. Balla bëri thirrje që drejtësia dhe policia të bëjnë punën e vetë. Ai tha se ngjarja është e rëndë, dhe se të plagosurit i janë nënshtruar ndërhyrjes kirurgjikale.
“Ngjarja është shumë e rëndë dhe shpresoj që kolegu ynë dhe bashkëpunëtori i tij i ngushtë t’ja hedhin kësaj gjendje të vështirë. Sipas mjekëve, ata i janë nënshtruar ndërhyrjes kirurgjikale. Është një ngjarje e rëndë që më vjen keq ta them, është produkt i kësaj ndasisë që mbillet cdo ditë. Shpresoj që cdo qytetar ta kuptojë që në këto ditë të vështira lufte, të jemi të bashkuar apo të ndarë.
Lëreni policinë dhe drejtësinë të bëjë punën e vet. Ti marrësh jetën tjetrit nuk ta justifikon për asgjë. Pra dy persona sot luftojnë për jetën. Nuk e dimë kush është arsyeja, por di që një i çmendur ka marrë thikën dhe ka shkuar të godasë. Unë di që kjo ndasia dhe urrejtje duhet të ndalet. Ne shqiptarët jemi pak, nuk jemi shumë dhe mjaft më duke vrarë njëri-tjetrin”.
