Organizata Botërore e Shëndetësisë deklaroi se përhapja e koronavirusit Covid-19, “mund të karakterizohet si pandemi”. Numri më i lartë i vdekjeve shënohet në Kinë, aty prej nga ku shpërtheu dhe u shpërnda më tej Covid-19.
Por ndërkohë që Kina duket se po ia del ta mbajë nën kontroll virusin e ri, në Itali situata shfaqet problematike.
Po përse Italia ka numrin më të lartë të të infektuarve dhe të të vdekurve? Një pjesë e përgjigjes mund të qëndrojë në shpërndarjen e moshave të popullsisë së Italisë.
Italia ka një popullsi më të vjetër, me një përqindje më të madhe të të rriturve mbi moshën 65 vjeç sesa SHBA. Ndërsa sipas një shkrimi të “Daily Mail”, Italia ka popullsinë më të madhe të të moshuarve në Evropë, me gati një të katërtën e njerëzve (22 për qind) të moshës 65 vjeç, ose më të vjetër. Mosha mesatare është 46.5 vjeç, sipas CIA, e pesta më e lartë në botë.
Faktori moshë mbetet me mjaft rëndësi, pasi sistemi imunitar dhe mushkëritë janë më të dobët. Për rrjedhojë, trupi është më pak i aftë të heqë pneumoninë, të cilën virusi e shkakton në shumë raste.
Presidenti lokal i Lombardisë, Attilio Fontana, konfirmoi se personat e riskuar janë të moshuarit dhe personat të cilët janë të sëmurë.
“Të gjitha vdekjet që kemi pasur janë ose njerëz të moshuar, ose njerëz shumë të sëmurë”, raportoi New York Times.
Midis 60 dhe 69 vjeç, shkalla e vdekjes është rreth 3.6 për qind, ndërsa është më shumë si 1.3 për qind për ata të moshës 50 deri në 59 vjeç. Për njerëzit në të 40-at e tyre kjo bie në 0.4 për qind, dhe është vetëm 0.2 për qind për ata në të 30-tat.
