Kryeministri Edi Rama, mbajti një fjalim në panelin e Kongresit të Socialistëve dhe Demokratëve në Berlin. Ai foli për sfidat e Shqipërisë dhe dëshirën e madhe të shqiptarëve për tu bërë pjesë e familjes së madhe të BE-së. Po kështu nuk munguan as batutat nga kryeministri Rama, i cili në fillim të fjalimit, vendosi në siklet politikanen holandeze Kati Piro, e cila po drejtonte Kongresin. Teksa Piri po thoshte se është nder që ta kishin mes tyre, Rama kërkoi të dinte arsyen përse. Politikania holandeze u mundua ta kalonte me buzëqeshje. Ndonëse u vendos në siklet, ajo u përgjigj duke thënë se është nder, pasi është një politikan i vërtetë.
Pjesë nga diskutimi:
-Zoti kryeministër, është nder edhe për mua që ndaj këtë skenë me ju, dhe është nder, në fakt, për të gjithë ne. Atëherë, ju si kryeministër i Shqipërisë, si mendoni ose cilat janë përparësitë dhe prioritetet për vitet në vijim për bashkëpunimin europian?
-Edi Rama: A mund të ma shpjegosh pse është nderi juaj?
-Është nder sepse ky është një politikan i vërtetë, është nder sepse ne njëherë kemi qenë nëpër takime në Zoom duke diskutuar për Ballkanin Perëndimor. Ju konsideroj gjithmonë një folës tejet interesant dhe nuk është sa për ta thënë në këtë skenë, sepse mund të jeni mjaft provokues, çka më pëlqen si holandeze. Priresh të jesh shumë i drejtëpërdrejtë, kështu që është një nder t’ju takoj ballë për ballë.
-Edi Rama: Mirë, le të themi që jam bindur tani. Po mendoja se cili do të ishte një kontribut i vlefshëm në këtë Kongres, ndërsa vij nga një vend që nuk është në BE, por është në E, në Europë dhe duke qenë pjesë e kësaj hapësire në zemër të Europës, në zemër të Bashkimit Europian, por jashtë Bashkimit Europian, që është Ballkani Perëndimor dhe mendova se nuk do ishte ide e keqe nëse do të përpiqesha të përcillja mesazhin se ajo çka nisi pak ditë më parë apo disa javë më parë në Pragë, në përpjekjen për ta bashkuar Europën përtej kufijve të Bashkimit Europian dhe për të përfshirë vende që në një mënyrë ose në një tjetër janë të lidhura, jo vetëm me fatin, thjeshtë me fatin e Europës, por gjithashtu me mënyrën sesi ecën përpara Bashkimi Europian.
