Mero Baze/Ka një keqpërdorim të asaj çfarë unë kam thënë rreth pafuqisë së Berishës, në situatën që po kalon sot partia e drejtuar nga Lulzim Basha. E zhvendosur nga konteksti, duket sikur Sali Berisha është i pafuqishëm në Partinë Demokratike. Në të vërtetë, ajo që dua të theksoj është se Sali Berisha është në një telash serioz me partinë e re të Lulzim Bashës, e cila jo vetëm nuk ka lidhje organike dhe politike më me Partinë Demokratike të Berishës, por është e kompozuar në një mënyrë të tillë, që Berisha nuk ka kë të zgjedhë aty, për ta përballur me Bashën.
Lulzim Basha ka ndërtuar një parti mbështetur mbi tre kategori të pakontrollueshme dhe të padobishme për Berishën. Kategoria e parë janë njerëzit e tij anonimë që ka futur në lista, kryesisht klientë të kompanive të biznesit familjar dhe biznesmenë që e kanë blerë vendin në Parlament. Këta janë “No name, no face, no number”, por thjesht njerëz të Bashës për të plotësuar numrat.
Mes tyre, Sali Berisha nuk hyn dot, as përzgjedh dot. Janë thjesht një arsye për t’u zënë vendet njerëzve politikë në PD.
Kategoria e dytë, që duket sikur është “qokë” për Berishën, janë disa deputetë nga më vulgarët e mundshëm të Berishës, për të cilët Berisha nuk ka çfarë thotë. Berisha i ka përdorur ata si “zagare gjahu” ndaj të tjerëve, duke qenë njerëz pa personalitet, shpesh qesharakë, dhe të padobishëm për atë për t’i piketuar si drejtues, por thjesht si gurhedhës, apo zhurmues.
Simboli i tyre është Flamur Noka, dhe në radhë pas tij Strazimiri, Bumçi, Paloka etj.
Kategoria e tretë e promovuar politikisht fuqishëm në PD nga Basha, është Partia Demokrate e Genc Pollos e vitit 2001. Gjithë grupi parlamentar i Pollos i vitit 2001, është sërish në Parlament dhe ka udhëhequr qarqet më të rëndësishme të vendit.
Në memorien e Partisë Demokratike, fraksioni “Pollo”, ose Partia Demokrate, mbetet produkti më i urryer politik, pasi ka tentuar të godasë PD-në dhe ta shkatërrojë atë, në momentet e saj më të vështira. Ata përdorën pushtetin e asaj kohe, për t’i vjedhur PD-së vulën, siglat dhe emrin në fletën e votimit, përmes të cilës arritën të marrin 5 deputetë.
I gjithë ky grup tani është në Kuvend. Genc Pollo, Tritan Shehu, Valentina Duka dhe Myslim Murrizi, kanë udhëhequr qarqet më të rëndësishme në vend, dhe po të shtosh dhe Nard Ndokën, që po ashtu ka qenë deputet i asaj partie në atë kohë, rezulton se PD e Pollos, është më e fortë në vitin 2017, se sa në vitin 2001, kur u themelua dhe u fut në Parlament nga Ilir Meta.
Madje ka qarqe si ai i Korçës, ku linja anti-Berishë e Pollos dominon e gjitha, pasi dy janë deputetë të Pollos, njëri është rivali humbës i kryetarit të FRPD, Belind Këlliçit, i cili nuk u fut në lista, edhe pse është fitues, dhe vazhdon pastaj me Andrea Manon.
Duke qenë përballë një partie në krizë, e cila ka një grup parlamentar thuajse armiqësor me Berishën, ose indiferent me Berishën, përveç disa zagarëve të tij të gjahut, Berisha është tërësisht duarlidhur për të vepruar në PD.
Berisha nuk ka frikë të veprojë dhe as të përpiqet të zgjedhë dikë tjetër, por Berishës i duhet një PD e madhe dhe e bashkuar, se ka hallet e veta dhe kërkon ta ketë si imunitet. Bashës nuk i duhet një e tillë. Atij i duhet një parti e vetja, qoftë dhe e vogël, për bizneset e tij, dhe po ja arrin.
Është kjo arsyeja që Berisha ka lëshuar njerëzit e familjes së tij të flasin kundër Bashës dhe të ngrejnë profilin e tyre politik përballë tij, për t’i përgatitur për betejën e ardhshme. Malltezi është qartazi duke bërë nxehje për këtë post.
Por pavarësisht planeve, Berisha këtë radhë është i dënuar të heshtë, pasi kush flet i pari, humbet. Dhe ai nuk do të rreshtohet me humbësit. (TemA)
