PS vijon ”merkaton” te LSI, largohen edhe 100 të rinj nga partia e Kryemadhit

Prej disa javësh, shumë simpatizantë por edhe anëtarë të Lëvizjes Scialiste për Integrim, i janë bashkuar Partisë Socialiste, vetëm pak muaj para zgjedhjeve.

Së fundmi, edhe 100 të rinj dhe të reja janë larguar nga dega e LSI në Berat dhe morën ditën e sotme teserën e PS-së.

Të rinjtë u shprehën se me LSI-në nuk i lidh më asgjë, pasi sipas tyre kjo forcë politike përfaqëson një rreth të ngushtë interesash familjarë.

”Ne kemi dhënë kontributin tonë për LSI që në vitet e para të gjimnazit.  Por sot me LSI nuk na lidh me asgjë sepse LSI nuk përfaqëson më asgjë tjetër përveç një rrethi të ngushtë interesash familjare dhe politike!  Jemi shumë të keqardhur që LSI sot është kthyer në një parti ku duhet të jesh ose kushëri ose shërbëtor i familjes së udhëheqjes. Ne do të vazhdojmë të angazhohemi si qytetarë në politikë për Beratin që duam me Edi Ramën dhe Partinë Socialiste”, u shprehën ata.

Edhe më herët nga kjo forcë politike, kryesiosht në Qarkun e Beratit, ka pasur rrjedhje të rëndësishme. Ka qenë fillimisht ish-ministri Nasip Naço ai që deklaroi kalimin te PS. Më pas kështu veproi dhe ish-deputeti Gledion Rehovica.

Në Gjeroven të Beratit pak ditë më parë, dega e LSI u shkri pasi të 140 anëtarët deklaruan kalimin te PS-ja.