PS ka nisur procesin për propozimet e kandidaturave për emrin e Kreut të ri të Shtetit, ndërsa presidenti aktual Ilir Meta ndodhet për një vizitë zyrtare në komunat e banuara nga arbëreshët në Civita.
“Përherë i nderuar nga mikpritja e ngrohtë e Arbëreshëve. I lumtur që ndodhem sot në qytezën e bukur të Civita, ku fryma e atdhedashurisë dhe krenaria për historinë, traditën, kulturën dhe trashëgiminë kombëtare ruhen ende të gjalla si në Motin e Madh të Kryeheroit tonë Gjergj Kastriot Skënderbeut”, shkruan Meta bashkëngjitur disa fotove që i ka shpërndarë në Facebook.
Pas propozimit të emrave nga deputetët e mazhorancës, pritet që të mërkurën të zhvillohen konsultimet e para mes grupeve parlamentare. Ka qenë Taulant Balla, i cili një ditë më parë ftoi Enkelejd Alibeajn si kreun e grupit më të madh parlamentar në radhët e opozitës dhe Mesila Dodën e Fatmir Mediun për një takim në ambientet e Kuvendit.
Gjatë mbledhjes së sotme ka mbajtur fjalën e tij edhe kryeministri Edi Rama, i cili u tha deputetëve të tij se vendit i duhet një “President normal, e kundërta e Ilir Metës”.
