Presidenti Meta ka dalë në një konferencë për shtyp, për të sqaruar sipas tij këtë moment amullie të krijuar pas vendimit të tij për të shfuqizuar dekretin për zgjedhjet vendore.
Meta përsëriti arsyet që e çuan në marrjen e këtij vendimi, ndërsa më tej shtoi se ai ka bërë zgjedhjen më të mirë dhe të domosdoshme për të shmangur konfliktin e mundur.
Më tej, presidenti thumboi kryeministrin Rama, teksa tha se “Republika nuk është monopartizim, po zgjedhje të lira e të barabarta dhe Republika s’mund të jetë kapje e institucioneve nga ana e mazhorancës.”
Po ashtu, Meta tha se zgjedhjet do të zhvillohen në një datë të mëvonshme, sipas afateve të Kushtetutës dhe se kjo periudhë duhet të shërbejë për reflektimin e të dy palëve.
Fjala e Metës:
Data 30 qershor mund të provokojë përplasje civile. Kam bërë të ditur të gjitha argumentet kushte, juridik e ligjor mbi të cilin mora këtë vendim. Që nga ky moment kam vënë re për fat të keq akuza që thuhet se presidenti ka marrë një vendim politik duke krijuar një moment amullie. Jam i detyruar të dal përpara jush për të dhënë disa sqarime.
Kushtetuta nuk përcakton afatin kur zhvillohen zgjedhjet, këto detaje formale i ka kodi zgjedhor. Partitë politike e dinë se si janë sjellë, kanë ndryshuar kodin por edhe kushtetutën brenda një nate.
Në respekt të parimeve të kushtetutës kam bërë zgjedhjen më të mirë bazuar në rrethanat. Vendimmarrja e presidentit sipas tyre bëhet vetëm kur të ketë dakordësi nga partitë politike. Pra presidenti duhet të marrë leje, sipas partive.
Vendimmarrja e presidentit u bë e domosdoshme në kushtet e përshkallëzimit të vullneteve dhe aksioneve të të dy palëve politike, të ngritjes së tensionit në vend.
Në bindje të plotë, mora vendimin e duhur për të shmangur konfliktin e mundur. Republika nuk është monopartizim, po zgjedhje të lira e të barabarta. Republika s’mund të jetë kapje e institucioneve nga ana e mazhorancës.
Zgjedhjet do të zhvillohen në një datë të mëvonshme, brenda afatit të Kushtetutës. Ju bëj thirrje palëve që të analizojnë Kushtetutën. Presidenti i gatshëm të ndërmarrë detyra të rëndësishme për t’i shërbyer interesit të përgjithshëm. Të gjendet një zgjidhje urgjente për krizën./ Tirana Today
