Kryetari i Partisë Demokratike, Lulzim Basha ka reaguar ndaj Presidentit të Serbisë, Aleksandër Vuçiç, i cili publikoi një foto në rrjetet sociale, ku paraqitej harta e Kosovës me flamurin serb.
Sipas Bashës, deklaratat e Vuçiç nuk i shërbejnë bashkëpunimit, paqes dhe stabilitetit në rajon, por nxisin konflikt dhe perçarje.
Basha u shpreh se Kosova e pavarur është realitet i pakthyeshëm, dhe se shfaqje të tilla nacionaliste dëmtojnë vetëm Serbinë.
”Deklaratat dhe veprimet e Presidentit të Serbisë Aleksandër Vuçiç nuk i shërbejnë bashkëpunimit, paqes dhe stabilitetit në rajon, ato nxisin konflikt dhe perçarje. Kosova e pavarur është realitet i pakthyeshëm. Shfaqje të tilla nacionaliste dëmtojnë vetëm Serbinë dhe tregojnë qasjen destruktive të lidershipit të saj.
Sa më shpejt të pranohet realiteti i Kosovës së lirë dhe të pavarur, aq më mirë do të jetë për Serbinë, popullin e saj dhe gjithë Ballkanin për të ecur më shpejt drejt BE-së si interesi më i mire i popujve tanë.’’, shkruan Basha në rrjetin social, Facebook.
