Gjirokastra do të shënojë nisjen e betejës së parë të opozitës për pavlefshmërinë e zgjedhjeve të 25 Prillit në Kolegjin Zgjedhor. E hëna do të shënojë procesin e parë, ndërkohë që edhe betejat e tjera që u shqyrtuan në Komisionin e Ankesave dhe Sanksioneve do të zhvendosen drejt Kolegjit Zgjedhor.
Sipas burimeve nga KAS dhe nga opozita, mësohet se Komisioni i Sanksioneve dhe Ankesave do të përmbyllë të hënën të gjithë procesin e kundërshtive të partive ndaj rezultatit të zgjedhjeve.
Tri vendimet e mbetura i përkasin Korçës, Elbasanit dhe Fierit. Edhe vendimi i shqyrtimit nga KAS i kundërshtive të opozitës edhe për këto tri qarqe pritet të ketë fatin e vendimeve të mëparshme, duke u rrëzuar pretendimi për pavlefshmëri dhe përsëritje zgjedhjesh.
Pavarësisht kërkesave të PD-së dhe LSI-së për t’i përsëritur zgjedhjet, KAS ka refuzuar për të marrë prova shtesë nga institucionet që, sipas opozitës, do të vërtetonin masakrën zgjedhore të 25 Prillit.
Rezultati i zgjedhjeve nuk ndryshoi edhe kur KAS pranoi të rinumërohen disa kuti, si në rastin e Beratit dhe Durrësit. Pasaktësitë në kuti rezultuan aq të vogla, saqë LSI nuk u afrua fare tek mundësia për të përfituar një mandat në këto qarqe.
Ndërkohë, PD ka protestuar përmes avokatit Logu për refuzimin e KAS për të marrë prova shtesë nga institucionet që do të vërtetonin masakrën zgjedhore që pretendon opozita. Shumica e anëtarëve në KAS thanë se legalizimet, shit blerja e votës, apo të dhëna të tjera janë objekt i punës së prokurorisë dhe nuk mund të administrohen nga KQZ. Gjithsesi me kërkesë të dy anëtarëve të pakicës në KAS, i pranua kërkesa e PD-së për analizë të shenjave të gishtërinjve, ku në çdo qark të verifikuar, rezultuan se kishte persona që kishin votuar disa herë.
