Një protestë e furishme po zhvillohet në qendër të Beogradit, teksa qindra njerëz janë mbledhur para ambasadës së Malit të Zi për të kundërshtuar miratimin e Ligjit për Lirinë Fetare.
Sipas mediave të huaja, protesta është organizuar nga Klubi Studentor i Fakultetit të Drejtësisë në Beograd.
Më herët gjatë ditës së sotme, para Ambasadës malazeze në Beograd u organizua edhe një miting kundër këtij ligji, i organizuar nga lëvizja opozitare Dveri e udhëhequr nga Boshko Obradoviq.
Obradoviq u përlesh fizikisht me deputetët e pozitës në parlamentin e Serbi. Gjatë zhvillimit të seancës, ai hyri me një pankartë në duar, për të protestuar ndaj faktit që Serbia nuk ka reaguar për miratimit e këtij ligji.
Parlamenti i Malit të Zi ka miratuar një projektligj për komunitetet fetare, i cili është kundërshtuar nga opozita pro-serbe, duke ngritur shqetësimin se ky dokument mund t’i heqë Kishës Ortodokse Serbe të drejtën mbi pronësinë e pronave që administron.
