Ditën e sotme opozita e vendit do të zhvillojë një protestë përballë parlamentit, kundër zgjedhjes së Prokurorit të Përgjithshëm të Përkohshëm.
Tashmë qindra persona janë nisur me makina personale dhe autobusë nga rrethet, ndërsa deputetët e PD dhe LSI do të marrin pjesë në seancë, ku do të tentojnë bllokimin e kryeprokurorit të përkohshëm.
Por, ndryshe nga çdo protestë, opozita ka menduar një skenar të pandodhur më parë. Nëse në çdo protestë liderët mbajnë fjalime para tyre, këtë herë, pritet që protestuesit t’u bashkohen deputetëve të PD e LSI brenda në Kuvend.
Burime për BalkanWeb pranë PD konfirmojnë se protestuesit pritet të bashkohen me deputetët brenda Kuvendit.
“Burime konfidenciale thanë se do të jenë qytetarët që do t’i bashkohen deputetëve në parlament. Ndryshe nga rastet e tjera, kur kanë qenë deputetët që kanë dalë jashtë kuvendit, për t’iu bashkuar qytetarëve, sot do të ndodhë e kundërta,” u shpreh gazetarja Elda Menga.
