Kryetarja e Lëvizjes Socialiste për Integrim, Monika Kryemadhi zhvilloi një takim me kryetarin e Partisë Demokratike, Lulzim Basha.
Kyremadhi në këtë takim shoqërohet nga kreu i grupit parlametar të LSI-së, Petrit Vasili. Takimi që po zhvillohet në selinë blu mes dy drejtuesve të opozitës vjen pas paralajmërimeve se në Janar do të ketë të tjera protesta.
Takimi Basha-Kryemadhi, zhvillohet pasi të dyja partitë kanë biseduar me bazën për protestat e janarit. Në dy kampet politike bënë me dije se protesta e parë pritet të mbahet me 15 janar, ditë që përkon me nisjen e sesionit të ri parlamentar.
Kryetari i Partisë Demokratike, Lulzim Basha, ka nisur një tur takimesh me struktura në rrethe ku në qendër është diskutimi për aksionin i cili pritet që përveç debateve dhe kundërshtive politike në seanca dhe në komisionet parlamentare, do të jetë beteja në rrugë me protesta popullore.
Burimet bëjnë me dije se dy forcat politike si PD dhe LSI kanë programuar takime në rrethe deri në 12 janar.
Po ashtu edhe në kampin e Lëvizjes Socialiste për Integrim kanë nisur përgatitjet, ndërsa degët janë udhëzuar që të marrin masa për pjesëmarrje masive.
Sesioni parlamentar në dhjetor të vitit të shkuar u mbyll me protesta të opozitës, kundër zgjedhjes së Prokurores së Përgjithshme të përkohshme.
Beteja e opozitës në sesionin e ri do të jetë shumëplanëshe.
Paralajmërohet se dy do të jenë çështjet jetike për të cilat opozita fton qytetarët të protestojnë, varfërinë si produkt i një qeverisje ilegjitime dhe dhënien fund të asaj që e cilësojnë qeveri ilegjitime.
