Kryefjala në Shqipëri janë protestat pas vrasjes së të riut Klodian Rasha nga një efektiv policie në datë 8 dhjetor. Drejtuesi i Bindjes Demokratike, Astrit Patozi i ftuar në studion e “ABC”-së përballë gazetares, Juli Xhokaxhi bëri një analizë të tubimeve të fundit dhe theksoi se opozitat kanë ardhur në pushtet kur kanë hequr dorë nga dhuna.
“Shqipëria ka nevojë për revoltë, por jo për dhunë. Unë nuk e pranoj dhunën nga të dyja anët, qoftë në pushtet apo opozitë. Po deshe ta ndimosh qeverinë sulmoje me dhunë se e kalon të drejtën në anën tjetër. Unë nuk them se ata janë vandalë. Unë mendoj se brenda asaj proteste është fryma e revoltuar. Për mua është e papranueshme vrasja, ka pasur nevojë për një reagim të madh qytetar.
Dhuna kundër shenjave të qytetit, apo pronës publike dhe private nuk është zgjidhje. Qeveria nuk mund ta hedhë protestën në anën e opozitës. Por këta që shkatërrojnë nuk janë heronj, sikur përpiqen nga ana tjetër. Opozita nuk po di cfarë qëndrimi të mbajë. Kjo nuk është protestë vetëm kundër një ngjarje. Në protestë nuk mund të shkosh me kapuç. Opozitat kanë ardhur në pushtet kur kanë hequr dorë nga dhuna.”, tha ai.
Patozi nuk pajtohet me Voltana Ademin, që denoncoi se shkatërrimi i selisë së PS-së në Shkodër u bë nga të mitur të inflitruar që nuk ishin pjesë e protestuesve të tyre.
“Unë nuk besoj çfarë thonë aktorët politikë. Nuk kam prirje të besoj, shikoj atë që ndodhi. Dhe ajo që ndodhi nuk e nderon zonjën Ademi, me të cilën kam ndarë edhe bankën kur ishim në të njëjtin grup parlamentar, por nuk bashkohem me qasjen që ajo ka. Si mund të jetë një kryetare bashkie në protestë kur kryetari i saj nuk është. Ka raste kur kryetari mund të jetë dhe zyrtari i bashkisë jo, pasi të parë ka detyrën” tha ai. Por a do të dilte ai në protestë? “Nëse do të ishte protestë qytetare me qirinj dhe mjete paqësore do të isha pjesë”.
Por, çfarë komenti ka Patozi për përdorimin e gazit lotsjellës në tubim?
“Shumë normale, se një njeri që del në protestë, policia e ka për detyrë. Unë nuk jam i shqetësuar nga gazi lotsjellës, pse? Sepse kur del në protestë, politikan apo qytetar, minorenët nuk duhet të dalin, në protestë nuk shkohet për t’u përqafuar”. Por nga gazi e kanë pësuar edhe qytetarë që nuk kanë qenë në tubim. “Këto janë si puna e ilaçeve, efektet anësore.
Policia nëse do të shpërndarë një protestë nuk ka mjete të tjera përveç gazit dhe ujit. Ka pasur një ekzagjërim të dy anshëm, por unë jam në anën e protestuesve, por jo të shkatërrojnë qytetin”. Referencën që bëjnë socialistët me 21 janarin nuk e pranon. “Për 21 janarin është mbajtur përgjegjësi”, u shpreh Patozi.
Mesazhin e SHBA-së, Patozi e përkthen në këtë mënyrë. “U thotë këtyre të katërve, kujdes mos kaloni cakun”. Ndalur te zgjedhjet dhe aleancat, Patozi si drejtues i Bindjes Demokratike tha se “Jemi dënuar të bëjmë një pol të tretë” me partitë e tjera përballë PS, PD, LSI-së.
