Partia Socialiste nuk mjaftohet me procedimin penal ndaj 10 deputetëve të opozitës.
Kështu, sekretari i Përgjithshëm i PS-së, Taulant Balla tha se ndaj deputetëve do të merren masa të tjera.
Në një deklaratë për mediet, Balla tha se brenda 48 orëve Byroja e Kuvendit duhet të mblidhet për të shqyrtuar kërkesën për përjashtimin me 10 ditë të deputetëve nga Parlamenti.
“Brenda 48 orëve Byroja duhet të mblidhet për të shqyrtuar kërkesën për të përjashtuar me 10 ditë deputetët që ushtruan dhunë ne Kuvend. Detyra e deputetit është liria e fjalës dhe ushtrimit të detyrës. PS po përgatit një material për hapat që do të ndërmarrë më tej. Përgëzojmë hapat e marra nga Policia e Shtetit. Rasti i Kryemadhit është i paprecedentë dhe goditja është vepër penale. Ruajtja e rendit është detyrë e Gardës së Republikës. Ne presim ndjesë nga PD e LSI për situatën e djeshme dhe jemi të shqetësuar për sjelljen e opozitës, pasi fyen shqiptarët”, tha Taulant Balla.
