Ministri i Brendshëm, Sandër Lleshaj, është i mendimit se ka një prirje për të pasur dhunë në këtë protestë që pritet të mbahet më 16 shkurt. Ky ishte qëndrimi i tij, teksa ishte i ftuar në emisionin e Endri Xhafos në A2 CNN.
“Çdo protestë e PD ka qenë më historikja e mundshme. Edhe kjo kështu do të jetë. Kështu u definojnë organizatorët. Sa i përket dhunës, duket se ka një prirje për të patur dhunë, duke iu referuar deklaratave të opozitës”, tha Lleshaj.
Sa i takon masave të marra, Lleshaj u shpreh se policia nuk ka nxjerrë asnjë pengesë për protestën. “Policia ka përgjegjësi për të gjithë qytetarët dhe institucionet. Protestuesit janë vetëm një pjesë e vëmendjes së policisë”, tha ministri.
PD reagoi për bllokimin e rrugëve hyrëse në Tiranë, por Lleshaj tha se kjo nuk ka lidhje me protestën. “Qeveria nuk bllokon rrugë, por ndërton rrugë. Kontraktorët do të bëjnë punën e tyre, jo vetëm të shtunën, por edhe të dielën”.
