Protesta, policia: 6 të arrestuar dhe 23 të proceduar, mes tyre edhe Gazmend Bardhi

Pas protestës së opozitës të mbajtur ditën e enjte para parlamentit, policia ka shoqëruar disa protestues. Me anë të një njoftimi policia bën me dije se pasi janë vëzhguar kamerat ka arrestuar 6 shtetas, 6 të tjerë janë shpallur në kërkim dhe 17 persona të tjerë do të procedohen të lirë, ku mes tyre është edhe Sekretari i Përgjithshëm i PD-së, Gazmend Bardhi, si organizator i protestës.

Nga protestuesit e shoqëruar gjatë dhe pas protestës, pasi janë marrë në pyetje dhe janë bërë procedurat përkatëse, 11 protestues janë liruar.

Ndërkohë kreu i PD, Lulzim Basha në Facebook shkruan:

“Mirënjohje dhe respekt për çdo qytetar që sakrifikon nga vetja dhe familja për t’iu gjendur pranë me vendosmëri dhe kurajo protestuesve paqësorë, të ndaluar në mënyrë të paligjshme nga policia! Kjo është beteja më europiane që do të sjellë ndryshimin që meriton çdo shqiptar!”

Deklarata e policisë:

Policia e Tiranës nën drejtimin e Prokurorisë së Rrethit Gjyqësor Tiranë ka arrestuar 6 shtetas, për veprime të dhunshme mbi institucionet Kushtetuese, mbi Policinë dhe për shkatërrimin e pronës gjatë zhvillimit të protestës së opozitës nga Partia Demokratike dhe Lëvizja Socialiste për Integrim, ditën e sotme para parlamentit.

Veprimet proceduriale janë kryer në bazë të një analize të pamjeve filmike, raport shërbimeve, si dhe provave të tjera të mbledhura nga grupi hetimor.

Janë proceduar në gjendje të lirë dhe 17 persona të tjerë, ndërsa 6 shtetas janë shpallur në kërkim.

Është proceduar penalisht gjithashtu shtetasi G.B., organizator i protestës.

Janë arrestuar për konsumimin e elementëve të veprave penale “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetësisë publike” shtetasit:

– J.Gj., 24 vjeç, nga Shijaku;

– M.D., 24 vjeç, nga Mamurrasi;

– A.K., 20 vjeç, nga Rrësheni;

– B.D., 36 vjeç, nga Kavaja;

– E.M., 26 vjeç, nga Kavaja;

– D.P., 31 vjeç, nga Tirana.

Po punohet për identifikimin, kapjen dhe vënien para përgjegjësisë ligjore të personave të tjerë që kanë kryer veprime të dhunshme gjatë protestës së djeshme.

Materialet proceduriale do t’i referohen Prokurorisë së Rrethit Gjyqësor Tiranë, për veprime të mëtejshme.