Gjykata e Tiranës ka caktuar ditën e sotme masën e sigurisë “Arrest me burg” për 3 personat e arrestuar nën akuzën e bllokimit të rrugës në ‘Unazën e Re’.
Arrestimi i tyre erdhi si pasojë e ashpërsimit të ligjit për bllokimin e rrugëve, i cili tanimë konsiderohet një vepër penale që mund të dënohet deri në 3 vite burg. Eduard Ferhati, 27 vjeç; Ruzhdi Daci, 54 vjeç si dhe Tomor Gjata, 56 vjeç; u arrestuan pas protestës së mbajtur tek ‘Unaza e Re’ nga disa prej banorëve të Astirit.
Po këta banorë kanë protestuar ditën e sotme para gjykatës duke kërkuar lirimin e 3 të arrestuarve. Mbi ta rëndojnë akuzat “Organizimi dhe pjesëmarrja në grumbullime e manifestime të paligjshme” si dhe bllokimi i rrugës.
I pranishëm në protestë ishte edhe demokrati Klevis Balliu, i cili u shpreh se ndërkohë që qeveria vjedh, në burg futen qytetarët. Ai shtoi se bashkë me qytetarët do të tërhiqen që të marrin një vendim se çfarë rruge do të ndjekin për protestën e tyre, pasi kundërshtojnë projektin e Unazës së Madhe, ku parashikohet shembja e banesave të tyre.
“Ky do marrë zvarrë (Rama). Do tërhiqemi për vendim. Brenda 2-3 orësh do të vendosim se çfarë do të bëjmë. Ai nuk njeh asgjë. As familje, asgjë. Ata shijojnë paratë. Nga 3 milionë lekë që kishte në llogari, bëri shtëpi në Surrel. Këta vjedhin çdo ditë. 1 mln e 200 mijë euro i kanë dhënë këta banorë shtetit. Ai projekt banditesk nuk ndalet”, tha demokrati.
