Me vendimin e Qeverisë, nga dita e sotme hyri në fuqi Akti Normativ i cili ndalon hapjen e klubeve të natës, diskove, lounge bareve dhe çdo lloj shërbimi të kësaj natyre në mjedis të mbyllur apo të hapur, përveç restoranteve.
Ministria e Shëndetësisë bëri me dije se mosrespektimi i këtij detyrimi nga subjektet, dënohet me gjobë 3 000 000 lekë dhe me pezullim të aktivitetit për një periudhë një vjeçare.
Aktualisht përpara kryeministrisë, artistët dhe pronarët e lokaleve po zhvillojnë një protestë, ndërkohë nuk kanë munguar përplasjet me policinë.
Lidhur me këtë zhvillim, ka reaguar së fundmi kryeministri Edi Rama.
“E pakonceptueshme që ka njerëz që ngrenë zërin pse ministria e shëndetësisë shtrëngoi masën për klubet e natës e diskot, ndërkohë që hapja e tyre nuk është lejuar asnjë ditë pas rihapjes së madhe!
Zoti i ruajtë ata e familjet e tyre prej tyre dhe ruajtë të tjerët nga këto mendje”, shkruan kreu i qeverisë në rrjetin social Twitter.
E pakonceptueshme që ka njerëz që ngrenë zërin pse ministria e shëndetësisë shtrëngoi masën për klubet e natës e diskot, ndërkohë që hapja e tyre nuk është lejuar asnjë ditë pas rihapjes së madhe! Zoti i ruajtë ata e familjet e tyre prej tyre dhe ruajtë të tjerët nga këto mendje!
— Edi Rama (@ediramaal) July 20, 2020
