Edhe pse është fundjavë e ditë me shi, studentët më të vendosur se kurrë dolën përsëri në protestë. Prej orës 10:00 ata nisën rezistencën para ministrisë së Arsimit , për plotësimin e kërkesave për një arsim më cilësor.
Ministrja e Arsimit Lindita Nikolla doli në protestë, por është pritur me ovacione dhe ulërima pakënaqësie, çka ka bërë që ajo të kthehet sërish brenda Ministrisë. Kjo sepse studentët refuzojnë të kenë bisedime, pa u plotësuar më parë kërkesat bazë.
Një prej elementeve të protestës janë edhe pankartat, ku sot studentët denoncuan me emra, pedagogët që sipas tyre janë të korruptuar. Si edhe kërkojnë para e euro në këmbim të notës për provim.
“Korrupsioni ka ekzistuar gjithmonë në universitetet tona. Si mund të ketë një fushë në Shqipëri që nuk ekziston korrupsioni. Te universitetet publike historikisht shumë nga pedagogët kërkojnë para. Këtë fenomen e kam vënë re edhe kur kam qenë në universitete publike, si pedagogë i jashtëm.”
Avokati Çlirim Gjata ndër të tjera shprehet për Tirana Today se ministrja Nikolla nuk ka çfarë të bëjë, por është Kryeministri ai që sipas Gjatës, është duke u fshehur pas një gruaje.
“Kryeministri nuk e ha atë që të largojë ministren, sepse do i shkojnë atij pastaj. Ministri që do të vijë nuk mban përgjegjësi, prandaj e mban Nikollën, që ta mbajë ajo barrën. Më vjen keq ta them, por kryeministri është fshehur pas një gruaje.
Pa pyetur fare ti thua do ta bëj unë këtë projektin sepse kam pushtetin. Kurse ju të tjerëve iu shkel me këmbë e bëj çfarë të dua me ju. Dhe kështu sigurisht që do të vinte një moment që do të shpërthente, siç po ndodh me studentët. Këtu nuk është puna për të ikur një qeveri e ardhur një tjetër, rezultati më i madh do të ishte emancipimi.”
“Studentët që janë këtu, janë ata që kanë pushtetin politik e çfarëdolloj pushteti tjetër. Dhe ata mund të mbajnë këto kërkesa, të bëjnë të tjera e prapë do t’ia arrijnë qëllimit, nëse do të rrinë të bashkuar. Unë edhe pse kam mbaruar shkollimin, përsëri kam frikë për të ardhmen e arsimit për fëmijën tim. Ndaj si gjithë të tjerët, po mendoj që të iki,”-shprehet për Tirana Today një protestuese.
Në protestën e sotme tentuan të bashkoheshin edhe banorët e Astirit, por ata u refuzuan nga studentët. Kjo gjë shkaktoi tensione dhe debate, të cilat sollën nevojën e krijimit të një kordoni policie, për të ndarë protestuesit e Unazës nga studentët.
“Ne kemi djemtë tanë studentë,kurse këta nuk na pranuan. Do ikim në shtëpi, ne nuk kemi qëllime politike. Thjesht kemi ardhur për të protestuar për ata.”
Banorët thonë për Tirana Today se asnjëherë nuk donin të ngatërronin politikën, por kërkojnë të protestojnë edhe për fëmijët e tyre.
“Po na përzënë kot, në fakt është edhe mungesë respekti. Erdhëm nga Unaza e Re në këmbë që është goxha larg. Na kërkuan ndihmë ndaj edhe ne erdhëm, por të na prisnin me këtë lloj sjellje është shumë ofenduese.” TIRANA TODAY
