Opozita e bashkuar është mbledhur sot para Kryeministrisë, për të zhvilluar protestën e shtatë kombëtare.
Kryedemokrati Lulzim Basha po marshon drejt godinës me mbështetës të shumtë, ndërsa bie në sy pjesëmarrja masive e të rinjve.
Ndërkohë, po ashtu vihet re mungesa e kryetares së LSI-së, Monika Kryemadhi. Kjo e fundit nuk merr pjesë në protestën e shtatë të opozitës së bashkuar pasi ndodhet jashtë vendit për një vizitë.
Kjo është hera e dytë që Kryemadhi mungon në një protestë kombëtare. Ndërkohë, kreu i grupit parlamentar të LSI-së Petrit Vasili në krye të protestuesve që u nisën nga selia e LSI, tha se kryeministri Edi Rama nuk do lejohet të vendosë monizmin në vend. Duke komentuar hapjen e fushatës në Lezhë, ai tha se Rama shkoi në vendin e krimit.
“Nuk do e lëmë Ramën të vendosë monizëm. Rama shkoi në Lezhë tek vendi i krimit, ku tentoi të vjedhë në rrugën Milot-Balldren”, tha Vasili, ndërsa nuk ka preferuar të flasë për vizitën e kryetares së LSI jashtë vendit.
