Ministrja e Arsimit, Evis Kushi, ka komunikuar vendimin që është marrë sot në lidhje me protestën e pedagogëve. Ajo ka njoftuar se pas mbledhjes së qeverisë është vendosur që paga e pedagogëve të rritet me 15 për qind. 7 për qind rritja do të jetë nga buxheti i shtetit, dhe pjesa tjetër më pas do të realizohet nga buxheti i vetë Universiteteve.
“Sot në Këshillin e Ministrave morëm vendim të rëndësishëm që lidhet me pagat e pedagogëve. Është vendim që po punojmë prej disa kohësh. Pagat e pedagogëve të rriten deri në 15%, ku 7% do të mbulohet nga buxheti i shtetit, pjesa tjetër nga Universitetet.
Për kërkimin shkencor, mbështetja jonë do të vazhdojë dhe po diskutojmë për buxhetin e vitit 2023. Mbështetja do jetë edhe më e madhe.
Duhet të kuptojmë se pedagogët të ardhurat i sigurojnë jo vetëm nga paga bazë, por kanë edhe shumë mundësi të tjera, pra edhe nga programe të kërkimit shkencor të BE. Ne në muajin maj kemi miratuar marrëveshje 7 vjeçare”, tha më tej ministrja.
