Duket se kërkesa e pedagogëve për rritje të pagës me 50% është e panegociueshme. Kreu i qeverisë Edi Rama, i ka kthyer përgjigje pedagogëve pas protestës. Ai u shpreh se do të ketë një rritje prej 7% të pagës, por pjesa tjetër do të lihet në vendimmarrjen e universiteteve.
“Pedagogët janë në një hapësirë të ndërmjetme, midis mbështetjes shtetërore dhe horizontit ku mjafton të duash dhe ia bënë vetes rrogën edhe 2-fish, edhe 3-fish edhe 4-fish edhe 5-fish. Janë fondet e vetëfinancimit, evropiane dhe universitetet e tjera private.
Këtu s’dua të thellohem se ka një histori tjetër, të pagave të deklaruara pjesërisht. Kemi paga që nuk përkojnë me të vërtetën. Kjo është temë tjetër. Sa shumë para, potencial ka universiteti, për këtë e thashë.
Përpara kishim 44 pedagog në akses në fondet europiane, sot nga rreth 800 që janë sot te Universiteti i Tiranës mbi 400 kanë akses te fondet e BE-së. Kjo është falë profesionalizmit të tyre, eskperiencës së tyre dhe ndërkombëtarizimit të vendit. Mund të marrim shumë më tepër, por ama ishim të fundit në fund të postit. Sot s’jemi te të parët, por jemi duke hedhur hapa falë angazhimit të rektorëve.
Ne do të bëjmë një rritje pagash të mërkurën, kur është mbledhja e qeverisë për 7%, por universiteti do ti njohim të drejtën për rritje page të pedagogëve sipas vendimit të vetë. Universiteti është autonom. Në universitet nuk mund të jenë të gjithë njësoj”, tha Rama.
Pedagogët i janë kundërpërgjigjur kryeministrit Edi Rama, pasi ky i fundit premtoi një rritje të pagës me 7 për qind. Pedagogët janë shprehur se nëse nuk plotësohen kërkesat e tyre, ata nuk do të pranojnë të bëjnë asnjë kompromis.
Sipas tyre, ofertat për rritje me 7, 10, 20 apo 29% të pagës nuk do të merren parasysh. Ndërsa kërkuan mirëkuptimin e studentëve, pedagogët bënë të ditur se protesta e radhës do të jetë më 17 tetor.
