Të tjera detaje zbulohen nga takimi i kreut të PD, Lulzim Basha me nënkryetarët e partisë, Edi Paloka, Edmond Spaho, sekretarin e përgjithshëm Arben Ristani si dhe sekretarin organizativ Eno Bozdo.
Burime nga PD bëjnë me dije për “Balkanweb” se në takim është vendosur që sot në orën 10:00 të paradites, Basha do të zhvillojë një takim tjetër me aleatët parlamentarë për të përcaktuar datën e protestës së opozitës.
Po ashtu, në takimin që do të zhvillohet sot, Basha ka thirrur edhe kreun e PAA, Agron Duka.
Kujtojmë se gjatë ditës së djeshme, Basha zhvilloi një takim në selinë e PD edhe me kryetaren e LSI, Monika Kryemadhi si dhe me Petrit Vasilin, takim që zgjati rreth 1 orë e 30 minuta.
Dita më e mundshme për zhvillimin e protestës shihet 15 janari, datë në të cilën do të nisë edhe sesioni i ri parlamentar, ndërsa si kryetari i Partisë Demokratike, Lulzim Basha, ashtu edhe kryetarja e LSI-së, Monika Kryemadhi, deri në datën 12 janar, kanë parashikuar takime me strukturat e tyre, në përgatitje të protestës që do të mbahet në Tiranë.
