Arrestohet autori që goditi me gur në kokë punonjësin e policisë së FNSH, gjatë protestës që u zhvillua ditën e djeshme në Fier. Personi që goditi policin është punonjës në Bashkinë e Mallakastrës.
Pas analizimit të pamjeve filmike dhe provave të tjera të mbledhura, u bë identifikimi i personit. Shtetasi P.I, 56-vjeç, banues në Ballsh, me detyrë inspektor mjedisi në Bashkinë Mallakastër, u arrestua rreth orës 13:10.
Në vijim të veprimeve të kryera, policia e Fierit ka proceduar penalisht në gjendje të lirë edhe 10 protestues, si edhe janë shpallur në kërkim 2 shtetas të tjerë. Materialet i kaluan Prokurorisë pranë Gjykatës së Shkallës së Parë Fier, për veprat penale “Kundërshtim me dhunë i punonjësit të policisë së rendit publik”, “Goditje për shkak të detyrës” dhe “Organizim dhe pjesëmarrje në grumbullime dhe manifestime të paligjshme”.
