Prokuroria e Tiranës ka nisur verifikimin në lidhje me akuzat e parashtruara nga ana e PD-së ndaj nënkryetarit të Bashkisë, Arbjan Maznikut, ministres së Drejtësisë, Etilda Gjonaj si dhe për ish-ministrin e Bujqësisë, Niko Peleshi.
Partia Demokratike pretendon se Mazniku dhe Gjonaj kanë shpenzuar shumë të larta për akomodimin e tyre në vizitat e kryera jashtë vendit, ndërsa Peleshi dyshohet se ka futur një pesticid të dëmshëm në kohën kur ushtronte postin e ministrit të Bujqësisë.
Prokuroria e Tiranës ka hedhur hapin e parë për faturat e luksit që u publikuan në media pak ditë më parë për ministren Gjonaj. Prokuroria do të nisë verifikimin për akuzat që janë bërë në media, dhe më tej mund të nis dhe hetimin, nëse ka vend për një gjë të tillë.
Kujtojmë këtu faktin se ‘Faktoje.al’ publikoi pak ditë më parë disa fatura të Gjonajt, për udhëtimet e saj jashtë vendit. Në këto fatura vihej re shuma e lartë e paguar për të fjetur në hotel, ku një natë kapte shifrën 700 Euro. Për Niko Peleshin është nisur një verifikim, në lidhje me zhbllokimin e një ngarkese të kimikatit ‘Silikon Mix’.
